Operasi Plastik

Pakrikrik suaran kedisé nyinahang liang atiné ri kala langit kanginé ngancan galang, kéto masih suaran pancoran ngricik nyakcak batuné. Ketut Asta negak sambil nguadang bangkiang ngilangang kenjelné magaé uling pitung rahina. Iseng ia lakar masugi di tukadé, sedeng luwungé nyaup yéhé sagét misi luu plastik pesu uli pancorané. Buin cepok kajumunin nyaup yéh pancorané buin bakat luu plastik. Mara tolih-tolihina di tukadé ento liu sajan ada luu plastik. Ada luu ngengsut di akah kayuné, ngengsut di batu-batu abingé. Cingakina empelan di tebénan, luu plastik dogén ngebekin. Miribang ulian makelo ia tusing malali ka tukadé makada tusing nawang tukadé suba masalin dadi tongos leluu. “Badah! Adi kéné liu pesan luuné!” kéto ia ngrimik padidian ngrasa gedeg.

Buin maniné Ketut Asta iseng majalan di samping-samping tukadé ngalih uli dija luuné teka, buina makampil-kampilan luuné teka anyud. Suba telah di sisin-sisin tukadé tingalina liu ada leluu ané ngengsut, ada ané kambang di yéh tukadé. Uli joh ia ningalin anak negakin motor ngentungang luu makampil-kampilan uling duur jembatané.

“Woii pak! Da ngawag ngentungang leluu!”

“Woiii liak!”

Ningehang munyiné Keut Asta, anaké ento malaib. Ditu ia ngrimik padidiné ngrasa gedeg tekén anaké ento kerana ngawag ngentungang leluu. Yén ngandelin pemerintah dogén sinah tusing lakar ngidang. Yadiastun ané jani Pemerintah Bali suba mesuang Pergub indik sampah plastik miwah styrofoam. Kéwala yén ngandelin pemerintah dogén tusing lakar ngidang apa buin liu sajan ané tusing nawang aturan ento. 

***

Dina Redité Sekaa Truna Yowana Asri nglaksanayang pasangkepan indik wanti warsa sekaa trunané. Luh Sri sané mukak sangkepé sawireh ia dadi panyarikan sekaa trunané. 

“Titiang nunas uratian ida dané sareng sami santukan parikrama pasangkepan sané mangkin jagi kakawitin. Sané mangkin pasangkepan indik nyanggra rahina wanti warsa sekaa trunané kakawitin antuk pangwedar saking klian sekaa trunané. Inggih galah tiang sukserahang majeng klian sekaané.”

“Inggih titiang kawitin antuk nguncarang pangastungkara Om Swastyastu.”

“Om Swastyastu,” makasami angga sekaané nyaurin.

“Inggih, pasangkepan sané mangkin jagi kakawitin titiang, indik titiang saha prajuru sekaané nglaksanayang sangkep santukan sané mangkin sampun nampek rahina wanti warsa sekaa trunané ring tanggal 28 Oktober taler pateh sakadi rahina Sumpah Pemudané. Sakadi sané sampun-sampun, iraga satata ngaryanang acara. Sané mangkin ngiring bligbagang sané jagi karyanin,” kénten pangawit sangkep sané kawedarang olih klian sekaané ngawitin pabligbagané.

“Inggih semeton sareng sami, acara rapet sané mangkin kalanturang pabligbagan indik acara sané kakaryanin, titiang sané jagi ngénterang, inggih durusang tlatarang,” Luh Sri nglantur ngénterang acara pabligbagan.

“Tiang ngusul ngaé lomba makan karung ajak lari krupuk,” ada sekaa ané ngusulang.

“Wkwkwkwk... kikiki mabading to beli.”

“Yih sajan… xixixixi!”

“Tiang ngusul sing perlu ngaé lomba-lomba, pis kas anggo matuakan pang liang sekaané.”

“Sinampura beli, tiang ten setuju iraga patut ngaé acara né positif, pang ten tuutin né tekén alit-alité mani puan!” pemudiné nyautin sing setuju ajak usulan pis sekaa anggoné matuakan.

“Yén kéto apa lakar gaé?”

“Tiang dados ngusul?”

“Niki panglingsir jagi ngusul, sareng sami pirengang?”

“Wkwkwk… hihihi...” makasami sekaané masuryak wiréh Ketut Asta lakar ngusul.

“Tiang ngusul, apang sekaa truna ngaé acara oplas!”

“Nyén lakar operasi plastik, beli? Wkwkwk!”

“Cara bintang Koréa dogén oplas-oplas!”

“Oplas maksud beliné operasi sampah plastik, mabersih-bersih, ngedasin leluu plastik. Apabuin jani pemerintah suba ngaé peraturan indik leluu plastik, patut iraga ngwantu program pemerintahé. Yén pemerintah dogén tusing lakar ngidang nglaksanayang program ento, apabuin di désané ané sedek sibuk ngurusin piodalan. Iraga dadi generasi muda ané patut malaksana mangkin.”

“Melah sajan niki, tiang setuju sekaa truna ané lénan suba sibuk ngaé acara kéné. Iraga sing dadi kalah!”

“Inggih tiang taler setuju, iraga patut ngaé acara sosialisasi sampah ajak langsung mabersih-bersih. Krana liu ané sing nawang indik leluu plastik ento apabuin nu liu anaké ngentungang leluu ka tukadé!”

“Yéning kéto, semeton sareng sami wénten sané ten setuju indik acara ento?”

“Ten… sami setuju.”

“Yén kéto lan jani rembugang béndan lakar ngaé acara ento.”

Makasami sekaa trunané cumpu lakar ngaé acara mabersih-bersih leluu plastik. Acarané cumpu kalaksanayang ring dina Redité apang makejang ngidang milu wiréh liu ané sibuk magarapan.

Semengan sekaa truna suba makumpul di wantilan désané, panganggonné suba lengkap masepatu, masongkok. Klian sekaa trunané suba sadia lakar maang komando ngedum tugas pemudané apang énggal magaé. Sampuné lengkap sekaa trunané lantas majalan ka tukad désané, ditu ajaka makejang tuun ka sisin tukadé nuduk leluu plastik, styrofoam miwah leluhu ané ngranang cemer. Di akah-akah kayuné masih kajemak leluuné ané ngangsut, diastun daki tusing ada truna-truniné ané takut krana semangatné.

Krama désané liu ané ningalin sekaa trunané mabersih-bersih di tukadé, liu masih ané milu nulungin mersihin tukadé. Ketut Asta ané paling semangat ngedasin tukad krana mula ia ané ngelah idé ngaé acara makedas-kedas leluu plastik. Tusing engsap ané tugas bagian dokuméntasi masih sibuk ngaé video ajak moto-moto acarané ento. 

“Oplas! Oplas! Oplas!